๗. ภัททกาปิลานีเถริยาปทาน เล่ม ๓๓

๑๖๗|๑๖๗.๒๔๔| ปทุมุตฺตโร นาม ชิโน สพฺพธมฺมาน ปารคู อิโต สตสหสฺสมฺหิ กปฺเป อุปฺปชฺชิ นายโก ฯ |๑๖๗.๒๔๕| ตทา หิ หํสวติยํ วิเทโห นาม นามโก เสฏฺฐี ปหูตรตโน ตสฺส ชายา อโหสหํ ฯ |๑๖๗.๒๔๖| กทาจิ โส นราทิจฺจํ อุเปจฺจ สปริชฺชโน ธมฺมํ อสฺโสสิ พุทฺธสฺส สพฺพทุกฺขกฺขยาวหํ ฯ |๑๖๗.๒๔๗| สาวกํ ธุตวาทานํ อคฺคํ กิตฺเตสิ นายโก สุตฺวา สตฺตาหิกํ ทานํ ทตฺวา พุทฺธสฺส ตาทิโน ฯ |๑๖๗.๒๔๘| นิปจฺจ สิรสา ปาเท ตํ ฐานํ อภิปตฺถยึ ส หาสยนฺโต ปริสํ ตทา หิ นรปุงฺคโว ฯ |๑๖๗.๒๔๙| เสฏฺฐิโน อนุกมฺปาย อิมา คาถา อภาสถ ลจฺฉเส ปตฺถิตํ ฐานํ นิพฺพุโต โหหิ ปุตฺตก ฯ |๑๖๗.๒๕๐| สตสหสฺเส อิโต กปฺเป โอกฺกากกุลสมฺภโว |๑๖๗.๒๕๑| โคตโม นาม นาเมน สตฺถา โลเก ภวิสฺสติ ฯ ตสฺส ธมฺเมสุ ทายาโท โอรโส ธมฺมนิมฺมิโต |๑๖๗.๒๕๒| กสฺสโป นาม นาเมน เหสฺสติ สตฺถุสาวโก ฯ |๑๖๗.๒๕๓| ตํ สุตฺวา มุทิโต หุตฺวา ยาวชีวํ ตทา ชินํ เมตฺตจิตฺโต ปริจริ ปจฺจเยหิ วินายกํ ฯ |๑๖๗.๒๕๔| สาสนํ โชตยิตฺวาน โส มทฺทิตฺวา กุติตฺถิเย เวเนยฺยํ วินยิตฺวาน นิพฺพุโต โส สสาวโก ฯ |๑๖๗.๒๕๕| นิพฺพุเต ตมฺหิ โลกคฺเค ปูชนตฺถาย สตฺถุโน ญาติมิตฺเต สมาเนตฺวา สห เตหิ อการยิ ฯ |๑๖๗.๒๕๖| สตฺตโยชนิกํ ถูปํ อุพฺเพธํ รตนามยํ ชลนฺตํ สตรํสีว สาลราชํว ผุลฺลิตํ ฯ |๑๖๗.๒๕๗| สตฺตสตสหสฺสานิ จาติโย สตฺต การยึ นฬคฺคิ วิย โชตนฺเต รตเนเหว สตฺตหิ ฯ |๑๖๗.๒๕๘| คนฺธเตเลหิ ปูเรตฺวา ทีปานิ อุชฺชลยึ ตหึ ปูชนตฺถาย มเหสิสฺส สพฺพสตฺตานุกมฺปิโน ฯ |๑๖๗.๒๕๙| สตฺตสตสหสฺสานิ ปุณฺณกุมฺภานิ การยึ รตเนเหว ปุณฺณานิ ปูชนตฺถาย มเหสิโน ฯ |๑๖๗.๒๖๐| มชฺเฌ อฏฺฐฏฺฐกุมฺภีนํ อุสฺสิตา กญฺจนคฺฆิโย อติโรจนฺติ วณฺเณน สารเทว ทิวากโร ฯ |๑๖๗.๒๖๑| จตุทฺวาเรสุ โสภนฺติ โตรณา รตนามยา อุสฺสิตา ผลกา รมฺมา โสภนฺติ รตนามยา ฯ |๑๖๗.๒๖๒| วิโรจนฺติ ปริกฺขาโย อวฏํสา สุนิมฺมิตา อุสฺสิตานิ ปฏากานิ รตนานิ วิโรจเร ฯ |๑๖๗.๒๖๓| สุรตฺตํ สุกตญฺเจตํ เจติยํ รตนามยํ อติโรจติ วณฺเณน สสชฺฌาว ทิวากโร ฯ |๑๖๗.๒๖๔| ถูปสฺส เม ทิสา ติสฺโส หริตาเลน ปูรยึ เอกา มโนสิลาเยกา อญฺชเนน จ เอกิกา ฯ |๑๖๗.๒๖๕| ปูชํ เอตาทิสํ รมฺมํ กาเรตฺวา วรวาทิโน อทาสึ ทานํ สงฺฆสฺส ยาวชีวํ ยถาพลํ ฯ |๑๖๗.๒๖๖| สหาหํ เสฏฺฐินา เตน ตานิ ปุญฺญานิ สพฺพโส ยาวชีวํ กริตฺวาน สหาว สุคตึ คตา ฯ |๑๖๗.๒๖๗| สมฺปตฺติโยนุภุตฺวาน เทวตฺเต อถ มานุเส ฉายา วิย สรีเรน สห เตเนว สํสรึ ฯ |๑๖๗.๒๖๘| เอกนวุเต อิโต กปฺเป วิปสฺสี นาม นายโก อุปฺปชฺชิ จารุนยโน สพฺพธมฺมวิปสฺสโก ฯ |๑๖๗.๒๖๙| ตทา หิ พนฺธุมติยา พฺราหฺมโณ สาธุสมฺมโต อทฺโธ สนฺโต คุเณนาสิ ธเนน จ สุทุคฺคโต ฯ |๑๖๗.๒๗๐| ตทาปิ ตสฺสาหํ อาสึ พฺราหฺมณี สมเจตสา กทาจิ โส ทิชวโร สงฺคเมสิ มหามุนึ ฯ |๑๖๗.๒๗๑| นิสินฺนํ ชนกายมฺหิ เทเสนฺตํ อมตํปทํ สุตฺวา ธมฺมํ ปมุทิโต อทาสิ เอกสาฏกํ ฯ |๑๖๗.๒๗๒| ฆรํ เอเกน วตฺเถน คนฺตฺวาเนตํ มมพฺรวิ อนุโมท มหาปุญฺเญ ทินฺนํ พุทฺธสฺส สาฏกํ ฯ |๑๖๗.๒๗๓| ตทาหํ อญฺชลึ กตฺวา อนุโมทึ สุวิทิตา สุทินฺโน สาฏโก สามิ พุทฺธเสฏฺฐสฺส ตาทิโน ฯ |๑๖๗.๒๗๔| สุขิโต สชฺชิโต หุตฺวา สํสรนฺโต ภวาภเว พาราณสีปุเร รมฺเม ราชา อาสิ มหีปติ ฯ |๑๖๗.๒๗๕| ตทา ตสฺส มเหสีหํ อิตฺถีคุมฺพสฺส อุตฺตมา ตสฺสาปิ ทุติยิกา อาสึ ปุพฺพสิเนเหน อุตฺตริ ฯ |๑๖๗.๒๗๖| ปิณฺฑาย วิจรนฺเต โส อฏฺฐ ปจฺเจกนายเก ทิสฺวา ปมุทิโต หุตฺวา ทตฺวา ปิณฺฑํ มหารหํ ฯ |๑๖๗.๒๗๗| พุทฺเธ นิมนฺตยิตฺวาน กตฺวา รตนมณฺฑปํ กมฺมาเรหิ กตมฏฺฐํ โสวณฺณํ สตหตฺถกํ ฯ |๑๖๗.๒๗๘| สมาเนตฺวาน เต สพฺเพ เตสํ ทานมทาสิ โส เสนาสเน ปวิฏฺฐานํ ปสนฺโน เสหิ ปาณิภิ ฯ |๑๖๗.๒๗๙| ตํปิ ทานํ สหาทาสึ กาสิราเชนหนฺตทา ปุนาหํ พาราณสิยํ ชาตา กาสิกคามเก ฯ |๑๖๗.๒๘๐| กุฏุมฺพิกกุเล ผีเต สุขิโต โส สภาตุโก เชฏฺฐสฺส ภาตุโน ชายา อโหสึ สุปติพฺพตา ฯ |๑๖๗.๒๘๑| ปจฺเจกพุทฺธํ ทิสฺวาน มม ภตฺตุกนิยโส ภาตุ ภตฺตํ ตสฺส ทตฺวา อาคเต ตมฺหิ ปาวทิ ฯ |๑๖๗.๒๘๒| นาภินนฺทิตฺถ โส ทานํ ตโต ตสฺส อทาสหํ พุทฺธานานิย ตํ อนฺนํ ปุโน ตสฺเสว โส อทา ฯ |๑๖๗.๒๘๓| ตํ ทานํ ฉฑฺฑยิตฺวาน ทุฏฺฐา พุทฺธสฺสหํ ตทา ปตฺตํ กลลปุณฺณนฺตํ อทาสึ ตสฺส ตาทิโน ฯ |๑๖๗.๒๘๔| ทาเน จ คหเณ เจว อปเจ ปทุเสปิจ สมจิตฺตมุขํ ทิสฺวา ตทาหํ สํวิชึ ภุสํ ฯ |๑๖๗.๒๘๕| ปุโน ปตฺตํ คเหตฺวาน โสธยิตฺวา สุคนฺธินา ปสนฺนจิตฺตา ปูเรตฺวา สฆตํ สกฺกรํ อทํ ฯ |๑๖๗.๒๘๖| ยตฺถ ยตฺถูปปชฺชามิ สุรูปา โหมิ ทานโต พุทฺธสฺส อปกาเรน ทุคฺคนฺธา มทเนน จ ฯ |๑๖๗.๒๘๗| ปุโน กสฺสปธีรสฺส นิฏฺฐาปิตมฺหิ เจติเย โสวณฺณํ อิฏฺฐกํ วรํ อทาสึ มุทิตา อหํ ฯ |๑๖๗.๒๘๘| จตุชฺชาเตน คนฺเธน เตมยิตฺวา ตมิฏฺฐกํ มุตฺตา ทุคฺคนฺธโทสมฺหา สพฺพงฺคสุสมาคตา ฯ |๑๖๗.๒๘๙| สตฺตปาติสหสฺสานิ รตเนหิ จ สตฺตหิ กาเรตฺวา ฆตปูรานิ วฏฺฏีนิ จ สหสฺสโส ฯ |๑๖๗.๒๙๐| ปกฺขิเปตฺวา ปทีเปตฺวา ฐปยึ สตฺต ปนฺติโย ปูชนตฺถํ โลกนาถสฺส วิปฺปสนฺเนน เจตสา ฯ |๑๖๗.๒๙๑| ตทาปิ ตสฺมึ ปุญฺญสฺมึ ภาคินีหํ วิเสสโต ปุโน กาสีสุ สญฺชาโต สุมิตฺโต อิติ วิสฺสุโต ฯ |๑๖๗.๒๙๒| ตสฺสาหํ ภริยา อาสึ สุขิตา สชฺชิตา ปิยา ตทา ปจฺเจกมุนิโน อทาสิ ฆนเวฏฺฐนํ ฯ |๑๖๗.๒๙๓| ตสฺสาปิ ภาคินี อาสึ โมทิตฺวา ทานมุตฺตมํ ปุโนปิ กาสิรฏฺฐมฺหิ ชาโต โกลิยชาติยา ฯ |๑๖๗.๒๙๔| ตทา โกลิยปุตฺตานํ สเตหิ สห ปญฺจหิ ปญฺจ ปจฺเจกพุทฺธานํ สตานิ สมุปฏฺฐหิ ฯ |๑๖๗.๒๙๕| เตมาสํ วาสยิตฺวาน อทาสิ จ ติจีวรํ ชายา ตสฺส ตทา อาสึ ปุญฺญกมฺมปถานุคา ฯ |๑๖๗.๒๙๖| ตโต จุโต อหุ ราชา นนฺโท นาม มหายโส ตสฺสาปิ มเหสี อาสึ สพฺพกามสมิทฺธินี ฯ |๑๖๗.๒๙๗| ตโต อหุ จวิตฺวาน พฺรหฺมทตฺโต มหีปติ ปทุมาวติปุตฺตานํ ปจฺเจกมุนินํ ตทา ฯ |๑๖๗.๒๙๘| สตานิ ปญฺจนูนานิ ยาวชีวํ อุปฏฺฐหึ ราชุยฺยาเน นิวาเสตฺวา นิพฺพุตานิ จ ปูชยึ ฯ |๑๖๗.๒๙๙| เจติยานิ จ กาเรตฺวา ปพฺพชิตฺวา อุโภ มยํ ภาเวตฺวา อปฺปมญฺญาโย พฺรหฺมโลกํ อคมฺหเส ฯ |๑๖๗.๓๐๐| ตโต จุโต มหาติตฺเถ สุชาโต ปิปฺผลายโน มาตา สุมนเทวี จ โกสิโคตฺโต ทิโช ปิตา ฯ |๑๖๗.๓๐๑| อหํ มทฺเท ชนปเท สากลายํ ปุรุตฺตเม กปิลสฺส ทิชสฺสาสึ ธีตา มาตา สุจีมติ ฯ |๑๖๗.๓๐๒| ฆนกญฺจนพิมฺเพน นิมฺมินิตฺวาน มํ ปิตา อทา กสฺสปธีรสฺส กาเมหิ วชฺชิตสฺส จ ฯ |๑๖๗.๓๐๓| กทาจิ โส ตรุณิโก คนฺตฺวา กมฺมนฺตเปกฺขโก กากาทิเกหิ ขชฺชนฺเต ปาเณ ทิสฺวาน สํวิชิ ฯ |๑๖๗.๓๐๔| ฆเรปาหํ ติเล ชาเต ทิสฺวานาตปตาปเน กิมิกาเกหิ ขชฺชนฺเต สํเวคมลภึ ตทา ฯ |๑๖๗.๓๐๕| ตทา โส ปพฺพชิ ธีโร อหํ ตํ อนุปพฺพชึ ปญฺจวสฺสานิ นิวสึ ปริพฺพาชปเถ อหํ ฯ |๑๖๗.๓๐๖| ยทา ปพฺพชิตา อาสิ โคตมี ชินโปสิกา ตทาหํ ตมุปาคนฺตฺวา พุทฺเธน อนุสาสิตา ฯ |๑๖๗.๓๐๗| น จิเรเนว กาเลน อรหตฺตํ อปาปุณึ อโห กลฺยาณมิตฺตตฺตํ กสฺสปสฺส สิรีมโต ฯ |๑๖๗.๓๐๘| ปุตฺโต พุทฺธสฺส ทายาโท กสฺสโป สุสมาหิโต ปุพฺเพ นิวาสํ โส เวทิ สคฺคาปายญฺจ ปสฺสติ ฯ |๑๖๗.๓๐๙| อโถ ชาติกฺขยํ ปตฺโต อภิญฺญาโวสิโต มุนิ เอตาหิ ตีหิ วิชฺชาหิ เตวิชฺโช โหติ พฺราหฺมโณ ฯ |๑๖๗.๓๑๐| ตเถว ภทฺทกาปิลานี เตวิชฺชา มจฺจุหายินี ธาเรนฺตี อนฺติมํ เทหํ เชตฺวา มารํ สวาหนํ ฯ |๑๖๗.๓๑๑| ทิสฺวา อาทีนวํ โลเก อุโภ ปพฺพชิตา มยํ ตยมฺหา ขีณาสวา ทนฺตา สีติภูตามฺห นิพฺพุตา ฯ |๑๖๗.๓๑๒| กิเลสา ฌาปิตา มยฺหํ ภวา สพฺเพ สมูหตา นาคีว พนฺธนํ เฉตฺวา วิหรามิ อนาสวา ฯ |๑๖๗.๓๑๓| สฺวาคตํ วต เม อาสิ พุทฺธเสฏฺฐสฺส สนฺติเก ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ |๑๖๗.๓๑๔| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ ภทฺทกาปิลานี ภิกฺขุนี อิมา คาถาโย อภาสิตฺถาติ ฯ ภทฺทกาปิลานีเถริยา อปทานํ สมตฺตํ ฯ