๒. มณิปูชกเถราปทาน เล่ม ๓๓

๖๒|๖๒.๘| ปทุมุตฺตโร นาม ชิโน สพฺพธมฺมาน ปารคู วิเวกกาโม สมฺพุทฺโธ คจฺฉเต อนิลญฺชเส ฯ |๖๒.๙| อวิทูเร หิมวนฺตสฺส มหาชาตสฺสโร อหุ ตตฺถ เม ภวนํ อาสิ ปุญฺญกมฺเมน สํยุตํ ฯ |๖๒.๑๐| ภวนา นิกฺขมิตฺวาน อทฺทสํ โลกนายกํ อินฺทีวรํว ชลิตํ อาทิตฺตํว หุตาสนํ ฯ |๖๒.๑๑| วิชนํ อทฺทสํ ปุปฺผํ ปูชยิสฺสนฺติ นายกํ สกํ จิตฺตํ ปสาเทตฺวา อวนฺทึ สตฺถุโน อหํ ฯ |๖๒.๑๒| มมํ สีสมณึ คยฺห ปูชยึ โลกนายกํ อิมาย มณิปูชาย วิปาโก โหตุ ภทฺทโก ฯ |๖๒.๑๓| ปทุมุตฺตโร โลกวิทู อาหุตีนํ ปฏิคฺคโห อนฺตลิกฺเข ฐิโต สตฺถา อิมํ คาถํ อภาสถ ฯ |๖๒.๑๔| โส เต อิชฺฌตุ สงฺกปฺโป ลภตุ วิปุลํ สุขํ อิมาย มณิปูชาย อนุโภหิ มหายสํ ฯ |๖๒.๑๕| อิทํ วตฺวาน สมฺพุทฺโธ ชลชุตฺตมนามโก อคมาสิ พุทฺธเสฏฺโฐ ยสฺส จิตฺตํ ปณีหิตํ ฯ |๖๒.๑๖| สฏฺฐิกปฺปานิ เทวินฺโท เทวรชฺชมการยึ อเนกสตกฺขตฺตุญฺจ จกฺกวตฺติ อโหสหํ ฯ |๖๒.๑๗| ปุพฺพกมฺมํ สรนฺตสฺส เทวภูตสฺส เม สโต มณิ นิพฺพตฺตเต มยฺหํ อาโลกกรโณ มม ฯ |๖๒.๑๘| ฉฬาสีติสหสฺสานิ นาริโย เม ปริคฺคหา วิจิตฺตวตฺถาภรณา อามุตฺตมณิกุณฺฑลา ฯ |๖๒.๑๙| อาฬารมุขา หสุลา สุสญฺญา ตนุมชฺฌิมา ปริวาเรนฺติ มํ นิจฺจํ มณิปูชายิทํ ผลํ ฯ |๖๒.๒๐| โสณฺณมยา มณิมยา โลหิตงฺกมยา ตถา ภณฺฑา เม สุกตา โหนฺติ ยทิจฺฉสิ ปิลนฺธนา ฯ |๖๒.๒๑| กูฏาคารา คุหา รมฺมา สยนญฺจ มหารหํ มม สงฺกปฺปมญฺญาย นิพฺพตฺตนฺติ ยถิจฺฉิกํ ฯ |๖๒.๒๒| ลาภา เตสํ สุลทฺธญฺจ เย ลภนฺติ อุปสฺสุตึ ปุญฺญกฺเขตฺตํ มนุสฺสานํ โอสถํ สพฺพปาณินํ ฯ |๖๒.๒๓| มยฺหํปิ สุกตํ กมฺมํ โยหํ อทกฺขิ นายกํ วินิปาตา สุมุตฺโตมฺหิ ปตฺโตมฺหิ อจลํ ปทํ ฯ |๖๒.๒๔| ยํ ยํ โยนูปปชฺชามิ เทวตฺตํ อถ มานุสํ ทิวสญฺเจว รตฺติญฺจ อาโลโก โหติ เม สทา ฯ |๖๒.๒๕| ตาเยว มณิปูชาย อนุโภตฺวาน สมฺปทา ญาณาโลโก มยา ทิฏฺโฐ ปตฺโตมฺหิ อจลํ ปทํ ฯ |๖๒.๒๖| สตสหสฺเส อิโต กปฺเป ยํ มณิมภิปูชยึ ทุคฺคตึ นาภิชานามิ มณิปูชายิทํ ผลํ ฯ |๖๒.๒๗| กิเลสา ฌาปิตา มยฺหํ ภวา สพฺเพ สมูหตา นาโคว พนฺธนํ เฉตฺวา วิหรามิ อนาสโว ฯ |๖๒.๒๘| สฺวาคตํ วต เม อาสิ มม พุทฺธสฺส สนฺติเก ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ |๖๒.๒๙| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา มณิปูชโก เถโร อิมา คาถาโย อภาสิตฺถาติ ฯ มณิปูชกตฺเถรสฺส อปทานํ สมตฺตํ ฯ